Nagpadayon ang lokal nga panggamhanan sa Davao, pinaagi sa OFW and Families Crisis Center (OFWCC), alang sa paghatag og suporta sa mga Overseas Filipino Workers (OFWs) ug sa ilang mga pamilya pinaagi usab sa giya sa nagkadaiyang ahensya, ingon man sa paghatag og psychosocial ug financial assistance.
Sumala pa ni OFWCC Head Rosevic Joey Jayme, nga sa kasamtangan, nakatabang na ang buhatan og 162 ka kliyente, nga gilangkoban sa mga distressed OFWs, mga gipauli nga OFWs gumikan sa gubat, maltreatment, o mga emerhensya sa pamilya.
Naghatag usab kini og crisis intervention alang sa mga pamilya nga naapektohan sa mga problema sa OFWs ug kung gikinahanglan, mamahimo usab nga muhatag ang buhatan og financial assistance gikan sa City Government pinaagi sa CSWDO Budget.
Kaniadtong 2024, nakatabang ang buhatan og kapin 70 ka pamilya pinaagi sa Assistance to Individuals in Crisis Situations (AICS) program nga nakatabang og tulo ka pamilya nga gitaganahan usab og livelihood programs.
Gipasiugda ni Jayme ang ilang kampanya batok sa Trafficking In Persons (TIP), nga naglakip sa mga inisyatibo susama sa pag-train sa matag barangay aron mapalalom ang kahibaloan bahin sa illegal recruitment.
Giawhag usab ni Jayme ang mga Dabawenyo nga magparehistro og tarong ug siguruhon nga lehitimo ang ilang mga employer o hiring agencies sa wala pa milarga paingon sa gawas sa nasud.
Gipahimangnoan usab niini ang mga Dabawenyos nga maglikay sa mga job ads sa Facebook nga adunay risgo sa human trafficking.
Dugang pa niini, nga ang OFWCC nag-organisar usab og mga programa alang sa mga anak sa OFWs ug siguruhon ang ilang partisipasyon sa annual Children’s Congress.
Sumala pa sa opisyal, nga kung adunay mga katuyoan o nanginahanglan og tabang, mamahimo sumala pa nga makontak ang OFWCC pinaagi sa ilang hotline ug magbisita sa ilang help desk sa CSWDO office, o magpadala og mensahe sa ilang Facebook page.
