DAVAO CITY – Dako ang pasalamat sa mga OFW sa Israel sa balita nga magbaton na ug ceasefire tali sa Israel ug Palestine. Gikanayon ni Bombo International Correspondent Jhonna Provido nga naka-basi karon sa Tel-Aviv, Israel nakaginhawa sila ug dako ug nakuhaan ang ilang tumang kahadlok sa dihang nasayran ang nahisgutang balita gumikan kay dili na mahimutang sa kakuyaw ang ilang mga kinabuhi ug mobalik na sa normal ang ilang mga paglihok-lihok.
Apan gikanayon ni Provido nga bisan ug gi-anunsiyo na ang ceasfire kagabii padayon lamang gihapon ang pagpalupad ug mga missiles tumong sa Israel.
Nagbaton ug gahum ang ceasefire alas dos kaganinang kaadlawon oras sa Israel samtang alas 7 usab kaganinang buntag oras sa Pilipinas.
Sa pikas bahin, sama sa ubang mga Pinoy nga nagtrabaho sa Israel, gibutyag ni Jhonna nga wala siyay plano nga mopauli sa Pilipinas bisan sa ilang nasinatiang kakuyaw karon sa maong nasud. Gihulagway niini nga mahimong mas lisud ang ilang kinabuhi kung mopa-uli sila sa Pilipinas ilabi na niining panahon sa pandemya.
