Gipasalig sa Office of the Ombudsman nga andam sila sa pagtubag sa petisyon nga gi-file ni kanhi Ako-Bicol Partylist Rep. Zaldy Co sa Supreme Court of the Philippines.
Sumala sa mensaheng gipadala ni Assistant Ombudsman Mico Clavano, ilahang ibutang sa ilahang komento ang mga kontra-argumento batok sa maong petisyon.
Gisulti niya kini human gimanduan sa Korte Suprema ang Ombudsman nga maghatag og komento kalabot sa petisyon sa kanhi magbabalaod.
Sa En Banc Session sa Supreme Court niadtong Miyerkules, gimanduan ang Ombudsman ug ang Independent Commission for Infrastructure (ICI) nga magsumite og ilahang tubag.
Gihatagan sila og napulo (10) ka adlaw gikan sa pagdawat sa notice aron motubag o magkomento sa petisyon nga bag-o lamang gi-file ni Co.
Gawas sa petisyon, gipakomento usab sila sa hangyo ni Co nga magpagawas ang Korte Suprema og T.R.O. o Temporary Restraining Order.
Apan, gipatin-aw sa Korte Suprema nga wala pa kini magpagawas og ingon nga kamanduan. Kahinumduman nga gi-file ni Zaldy Co ang petisyong Certiorari and Prohibition with Application for Writ of Preliminary Injunction and Temporary Restraining Order.
Sulod niini ang hangyo nga ibasura kon wad-an og bisa sa Korte Suprema ang resolusyon sa Ombudsman nga makasuhan siya og graft ug malversation sa Sandiganbayan.
Nagtuo ang kanhi magbabalaod nga adunay “grave abuse of discretion” sa resolusyon bisan pa man nga wala kini girekomenda sa ICI nga mapasakahan og kaso.
