DAVAO CITY – Nangandam na sab karon ang ahensiya sa Office of the Civil Defense (OCD) 11 sa mga angayan nga himuon dungan sa rainy season ilabi na nga usa sa mga dakong hagit nga ilang atubangon karon mao ang padayon nga suliran sa Covid-19.
Kahinumduman nga dungan sa deklarasyon sa PAG-ASA sa milabay nga semana nga masinatian na ang panahon sa ting-ulan, kalakip sa ilang gipangandaman karon mao mga gamiton nga evacuation center ilabi na nga daghanang mga tulonghaan sa siyudad ang gigamit isip quarantine facility.
Sa higayon sumala pa nga adunay himuon nga pagbakwit sa mga residente, kinahanglan sumala pa nga mohimo ug lakang ang mga ahensiya aron nga mapabilin ang mga health protocols sama na lamang sa Social distancing.
Samtang gibutyag sab ni Alfredo Baluran, head sa City Disaster Risk Reduction and Management Office (CDRRMO) nga kinahanglan himuon na karong duruha ang evacuation center kini aron masiguro nga adunay adtoan ang mga mobakwit nga mga residente bisan nga gigamit ang uban niini isip quarantine facility.
