DAVAO CITY – Mipanaw ang labing unang ‘homegrown’ bishop gikan Digos City, Davao del Sur ug kasamtangang obispo sa Pagadian, Zamboanga del Sur, nga si Bishop Ronald “Bong” Lunas human mipasailawom sa operasyon sa Davao City.
Gikumpirma ni Davao Archbishop Romulo Valles ngadto sa Cath’lic Bishops’ Conference of the Philippines kon CBCP ang iyang kamatayon sa alas-8:28 ang takna sa buntag, Enero 2, samtang nagpaalim kini human sa iyang heart bypass surgery kaniadtong Disyembre 28 sa Southern Philippines Medical Center Heart Institute, ning dakbayan.
Nasayran nga dugay nang nag-antos sa balatian si Bishop Bong ug na-admit sa nahisgutang ospital sukad pa niadtong Nobyembre ning milabayng tuig human kini nagka-atake sa kasing-kasing ug na-stroke.
Natawo si Bishop Bong sa Digos City, Davao del Sur ug na-ordinahan kini isip pari sa Diocese of Digos kaniadtiong 1992 ug naapoint isip obispo sa Pagadian niadtong Nobyembre 2018.
Nagpadangat og kasubo ang tibuok kaobispohan alang sa iyang pagpanaw.
via || Bombo LJF
