DAVAO CITY – Gihagit sa usa ka Obispo ang mga tulonghaan sa nasud nga mohimo sa ilang kontribusyon aron nga masulosyonan ang suliran sa illegal drugs ug seguruhon nga ang ilang mga tinun-an makalikay sa paggamit niini.
Matud pa kang Catholic Educational Association of the Philippines (CEAP) president Joel Tabora, angayan nga hatagan sa tanan nga mga tulonghaan ug atensiyon ang susama nga suliran aron nga dili kini sudlon sa mga estudyante.
Gitataw sab ni Tabora nga suportado sa CEAP ang baruganan sa Catholic Bishops Conference of the Philippines (CBCP) batok duguon nga war on drugs sa kasamtangang administrasyon apan kinahanglan sab nga mohimo ug lakang niini ang mga tulonghaan.
Sa kasamtangan, nakiglambigit na ang simbahan ngadto sa mga Catholic institutions ning siyudad aron nga mabisita ang mga Barangay ug ipatuman ang barangay-based rehabilitation programs kaabag ang City Government ug Department of Health (DOH).
Gidayeg sab sa Obispo ang pagpaningkamut sa pipila ka mga Catholic schools nga nagpatuman sa maong programa nga tumong ang pag-facilitate sa rehabilitation ngadto sa mga drug reformists.
