DAVAO CITY – Nagpabilin pa gihapon sa usa ka lokal nga punerarya sa Digos ang patay’ng lawas sa duruha ka mga lalaki nga susamang nakaangkon ug samad pinusilan sa ilang kalawasan.
Matud pa sa Digos PNP, hangtud karon wala pa gihapoy mi-claim nga kabanay sa mga biktima.
Una ng narekober ang patay’ng lawas sa mga nahisgutan sa Sitio Camalig Brgy.
Goma Digos nga nagbuy-od ug wala nay kinabuhi.
Gihulagway ang usa sa biktima nga anaa sa 5’4 ngadto na sa 5’5 ang gitas-on, gamayon ang lawas, nakasuot ug green t-shirt , naka-maong ug pantalon, adunay mga tattoo sa lawas ug anaa sa 30-35 anyos ang pangidaron.
Nakaangkon sumala pa kini ug samad pinusilan sa iyang lig-og. Samtang ang ikaduhang biktima gihulagway lamang nga anaa sa 5’3-5’4 ang gitas-on, nakasuot ug itom nga T-shirt ug pula nga sweat shirt, naka-pantalon, adunay tattoo sa iyang lawas ug anaa sa 25-30 anyos ang pangidaron.
Nakaangkon sumala pa kini ug samad pinusilan sa ilang likod nga milapos sa iyang dughan. Narekober sa crime scene ang basiyo sa .45 nga armas.
Sa pagpanubay sa kapulisan, posibleng mga rebel returnees ang mga biktima ug gipamatay sa ilang mga kaubanan human nga plano sa mga nahisgutan nga mobalik sa sabakan sa balaud dala ang ilang mga armas.
