DAVAO CITY – Subling mi-atake na usab ang mga ginsakpan sa rebeldeng grupo nga New People’s Army (NPA) ngadto sa usaka construction site pinaagi sa pagpang-sunog sa duha ka heavy equipment sa probinsya sa Davao del Norte.
Alas 10:55 kaganinang buntag mipatim-aw sa buhatan sa kapulisan si Florante Ferraren project engineer sa Ulticon Builders Incorporated (UBI) ug nagpahibalo nga gisunog sa mga armadong lalaki ang usaka unit sa ilang backhoe nga naa nahimutang sa Sitio Banualay Brgy. Palma Gil Talaingod, Davao del Norte.
Human madawat ang nahisgutang report, paspas nga gimanduan ni Police Chief Inspector (PCI) Rogaciano Gara ang iyang mga ginsakpan aron adtuon ang lugar nga nahitabuan.
Subay sa inisyal nga imbestigasyon sa kapulisan ngadto kang Leo Bustamante foreman sa UBI ug naka-saksi sa panghitabo, nasayran nga mga alas dies kaganinang buntag samtang nagtrabaho sila sa maong dapit, giduol sila sa 7 ka mga armadong kalalakin-an nga gituohang sakop sa NPA ug gi-ingnan nga “AYAW MO KAHADLOK MANGAU ME GAMAY DILI MAN MOHATAG”.
Samtang padayon pa usab nga ginasuta ang motibo sa pagpang-sunog.
Kahinumduman nga una nang gisunog usab sa mga rebeldeng ang napulo ka mga heavy equipment sa tulo ka mga barangay dinhi sa dakbayan niadtong Sabada diin hugatanon usab nga gikondena ni Davao City Mayor Inday Sara Duterte-Carpio, sa PNP ug sa AFP ang nahisgutang pagpangatake sa rebeldeng New People’s Army (NPA).
