DAVAO CITY – Gibutyag sa rebeldeng New People’s Army (NPA) Southern Mindanao nga nakapatay sumala pa sila ug 26 ka mga sundalo sa nagkadaiyang engkuwentro nga nahitabo kaniadtong Disyembre sa wala pa ang ilang gideklara nga ceasefire atol sa Christmas season.
Segun ni Rigoberto Sanchez, tigpamaba sa NPA Southern Mindanao Operations Command, nga ang mga natalang casualties resulta sumala pa sa pagpangatake sa mga rebelde batok sa tropa sa kagamhanan.
Gitataw sab sa nahisgutan nga ang susama nga pagpangatake usa ka “active defense batok sa ceasefire ug mga kalapasan sa tawhanong katungod nga nahimo sa tropa sa kagamhanan.
Nahimo sumala pang biktima niini ang mga miyembro sa 28th ug 66th Infantry Battalion (IB) ug Scout Rangers Company sa Barangay Tubaon, Tarragona, Davao Oriental.
Naglusad matud pa ang mga militar ug operasyon sa nahisgutan nga Barangay ayha pa man ang ceasefire nga nagsugod kaniadtong Disyembre 23, 2017 nga una na matud pa nga gipanghimakak sa militar sa ilang gipagula nga pahayag.
Gikanayong tulo ka adlaw ayha ang adlaw sa kapaskohan, 16 sumala pa ka militar sa Sitios Gibaan ug Bato-bato ang ilang napatay samtang duruha ang samaran.
Anaa sab sa walo pa ka mga militar sa 28th IB ug Scout Rangers ang ila sumala pa nga gi-atake kaniadtong Disyembre 30 sa Sitio Madian gawas pa sa pagpangharass nga ilang gihimo batok sa tropa sa 66th IB kaniadtong Disyembre 29 sa Barangay Marayag.
