DAVAO CITY – Brutal sumala pa nga gipamatay sa mga rebeldeng New People’s Army (NPA) ang usa ka sundalo ug iyang kaubanan nga cafgu nga ilang gibanhigan samtang sakay sa motorsiklo ug pauli na unta sa ilang detachment sa Brgy. L.S. Sarmiento Laak Compostela Valley Province.
Gikanayong naka-sibilyan lamang ug walay dala nga armas ang mga biktima dihang gipamusil sa ituohang sakop sa Guerrilla Front 3 sa NPA samtang nagsubay sa nahisgutang dapit paingon sa Brgy. Kidawa.
Naila ang mga biktima nga sila si Corporal Rey Haye ug CAA Bienvenido Detomal susama nga sakop sa 72IB. Gidala ang patay’ng lawas sa mga biktima sa usa ka punerarya sa Panabo City.
Samtang padayon ang gilusad nga hot pursuit operation sa tropa sa 66IB batok sa mga NPA nga ilang naka-engkuwentro sa Sitio Lanipga, Brgy Talian, Maragusan, Comval.
Responsable sumala pa ang mga NPA sa pagpangsunog sa tulo ka mga container vans nga puno ug karga nga saging ug gipanag-iyahan sa DOLE Philippines sa Purok Gemilina, Poblacion Maragusan Comval.
Gikondena ni Major General Rafael Valencia, 10ID commander ang sunod-sunod nga pagpangatake nga gilusad sa mga rebelde ingon man ang brutal nga pagpatay sa ilang mga sakop.
Luyo sa maong insidente, naglaom pa gihapon ang militar nga matapos na ang kagubot ug magpadayon ang hinabing pangkalinaw.
