DAVAO CITY – Patay ang usa ka notadong tulisan atol sa pagresponde sa usa ka tawag sa mga operatiba sa Sta. Ana Police Station human nga mipakita sumala pa kini ug pagsukol pasado alas siete sa buntag sa Prk. 8B sa Brgy. 31-D. Quezon Blvd. ning dakbayan.
Sa report gikan sa mga kapulisan, usa ka tawag gikan sa usa sa mga residente sa nahisgutang lugar ang nagpahibalo sa mga otoridad nga aduna sumala pa’y usa ka armado nga lalaki nga naila nga usa ka ‘’ Migi”, nagbahis-bahis nga walay sanina ug dunay nakasab-it nga sling bag. Girespondehan gilayon kini sa mga otoridad ug sumala pa, mihaaom kini sa paghulagway sa usa ka concerned citizen sa ilang pag-abot sa lugar.
Giduol kini sa mga operatiba apan nakabantay sumala pa ang suspek ug mibunot sa iyang .38 rebolber ug mipusil sa mga otoridad. Nakabalos pa ang usa ka pulis, apan nakadagan kining si Migi padulong sa covered court ug didto na napugos ang laing kauban sa usa ka pulis nga pusilon ang nahisgutan tungod sa mga sibilyan nga anaa sab sa covered court nga mamiligrong madamay sumala pa sa maong panghitabo. Gisulayan pa ug dala sa SPMC ang suspek apan gideklara kini sa mga doctor nga dead on arrival.
Sa pag-abot sa SOCO sa crime scene, narekober gikan sa nahisgutan ang .38 rebolber, duha ka mga bala, ug tulo ka mga basyo sa bala nga gituohan nga iyaha kini sa 9 mm pistol. Samtang sa ospital, nakumpiska sulod sa sling bag ang tulo ka managlahing gidak-on sa pakete sa shabu nga adunay street value nga P40,000.
Sumala pa sa kapulisan nga ang napatay nga suspek nga Francis Miguel Conjorado alias Migi 21-anyos nga residente sa Prk. 7-A sa nasampit nga baranggay ang notado sumala pa nga tigpangawat sa AOR sa Sta.Ana ug usa sab matud pa kini nga tigpayuhot ug iligal nga droga.
