Mipasa og petition for certiorari and prohibition ang Northern Davao Electric Cooperative Inc. (NORDECO) sa Korte Suprema. Tumong sa petisyon ang pagpugong sa implementasyon sa bag-ong balaod nga nagtugot sa Davao Light and Power Company (DLPC) nga mapalapdan ang ilang franchise area nga makapik-ap na sa mga lugar nga kasamtangang ginaserbisyohan sa NORDECO.
Gani, ang House Bill No. 11072, nga nahimong Republic Act No. 12144 pagkahuman nga lapsed into law niadtong Abril 6, 2025, maoy naghatag og legal nga basihan sa DLPC aron maserbisyohan ang mga lugar sa Davao del Norte ug Davao de Oro nga gilakip sa prangkisa niini.
Lakip sa mga lugar nga maapektuhan sa paglapad sa DLPC mao ang Tagum City, Island Garden City of Samal, Kapalong, Talaingod, Asuncion, San Isidro, New Corella, ug tanang lungsod sa Davao de Oro. Sa ilang petisyon, gibutyag sa NORDECO nga ang maong balaod makadaginot sa ilang operasyon ug mahimong makadaot sa kasamtangang mga serbisyo sa kuryente nga ilang ginatanyag sa ilang mga konsumidor.
