DAVAO CITY – Gitino ni Supt. Georby Manuel, Regional Director sa PNP Crime Laboratory nga wala sila nagduda kang Police Supt. Maria Christine Nobleza, Assistant OIC sa Crime Lab Davao nga aduna kini link sa grupong Abu Sayaff gumikan kay sama sa uban nga mga personahe, gihimo sumala pa sa nahisgutan ang iyang trabaho.
Dihang nagpahigayon si Supt. Manuel ug pagpanubay, nasayran lamang niini nga mamatikdan sa uban nga personahe sa ilang buhatan nga adunay makahinabi si Nobleza sa iyang telepono gamit ang uban nga lenguwahe.
Gawas niini, gitambagan na sab sumala pa sa opisyal kaniadto ang suspek nga mobalhin ug boarding house nga duol lamang sa ilang buhatan gumikan kay dako sumala pa ang magasto niini kung kanunay nga magpabilin sa hotel.
Buot ni Supt. Manuel nga pabalhinon ug boarding house si Nobleza kini aron nga ang nahisgutan maoy temporaryo nga modumala sa ilang buhatan sa higayon nga patambungon si Supt. Manuel ug seminar ingon man conference sa kaulohan apan nagmagahi matud pa si Nobleza ug buot niya nga adunay kaugalingon nga lawak aron makapahigayon siya ug pag-ampo subay sa ilang tinuhu-ang Islam butang nga wala na lamang nila kini gipugos nga mobalhin ug laing pinuy-anan sanglit iya matud pa kining katungod.
Atol sa ilang ulahing hinabi kang Nobleza, gibutyag sumala pa niini nga miadto siya sa Bohol gumikan kay aduna sumala pa siyay plano nga isuroy ang iyang pamilya sa lugar ug na-atol sumala pa nga adunay gilusad nga operasyon ang otoridad dayon gipangita ang cellphone nga gikanayong adunay contact sa bandidong grupo.
