Ipatuman og hugot sa Davao City Overland Transport Terminal (DCOTT) ang “No Pick-up Policy” o ang pagdili sa pagsakay sa mga pasahero direkta sa kadalanan sulod sa Davao City.
Kini aron malikayan ang kalapasan sa trapiko ug masiguro ang kahapsay sa pagbiyahe ilabi na karong panahon sa Pasko nga gilauman ang pagsaka sa gidaghanon sa mga pasahero.
Gipahibalo ni DCOTT Head Aiza Usop nga nagmugna ang City Government of Davao og Inter-Agency Task Force (IATF) aron motabang sa istriktong pagpangbantay sa maong polisiya.
Lakip sa mga ahensiyang nagtinabangay mao ang City Transport and Traffic Management Office (CTTMO), Land Transportation Franchising and Regulatory Board (LTFRB-XI), ug ang Highway Patrol Group (HPG) nga motutok sa pagmonitor sa mga Public Utility Vehicles (PUVs) ug sa pagdawat sa mga reklamo sa pasahero.
Gidapit usab ang mga pasahero nga musunod sa maong lagda ug molinya sa DCOTT terminal aron makasakay sa tarong nga paagi.
Gipahinumdoman nga ang maong polisiya dili lamang alang sa kahapsay sa trapiko, apan labaw sa tanan alang sa kaluwasan ug kasigurohan sa tanang commuters.
