Gikanayon sa City Tourism Operations Office (CTOO) nga panahon na aron susihon pagbalik ang “No Backpack Policy” sa Davao City, apan kinahanglan nga ang kaluwasan ug seguridad sa publiko magpabiling labing una nga hatagan og pagtagad.
Matud ni Jennifer Romero, officer-in-charge sa CTOO, nga daghang mga ginikanan, ang nagpangayo og konsiderasyon sa polisiya human kini wala tugoti nga makasulod sa Rio Carnival uban sa backpack nga adunay sulod nga gamit sa iyang anak.
Gisaysay ni Romero nga ang isyu nag-abli sa oportunidad aron hisgutan pag-usab ang mga karaang sumbanan sa seguridad, ilabi na kon adunay mga kahimtang nga nanginahanglan og sensitibong pagsabot.
Bisan pa man, giingon niini nga ang mga Dabawenyo disidido ug disiplinado sa pagsunod sa mga patakaran ug balaod sa siyudad. Gidugang sab niini nga kanunay nga ginapahimangnoan sa CTOO ang mga bisita kabahin sa mga ordinansa ug mga pamalaod nga gisunod sa tanang tourism sites ug kalihukan.
Sa laing bahin, giangkon sa Davao City Police Office nga wala pa kini makadawat og opisyal nga direktiba gikan sa lokal nga panggamhanan kalabot sa posibleng kausaban sa polisiya.
Samtang ang Public Safety and Security Office (PSSO) mipahibalo nga gikuhaan na og rekomendasyon sa seguridad ug safety sectors si Konsehal Luna Acosta alang sa tukmang amendment.
Ang “No Backpack Policy” unang ipatuman human sa pagpamomba sa Roxas Night Market niadtong tuig 2016 ug gipalapdan human sa laing pagpamomba sa Jolo Cathedral sa tuig 2019, nga gisuportahan ni kanhi Mayor Sara Duterte pinaagi sa Executive Order No. 41 aron mapalig-on ang “Culture of Security” sa siyudad.
