DAVAO CITY – Hugtanon nga ipatuman sa Davao City Police Office (DCPO) ang “No Backpack Policy” sa mga polling precincts atol mismo sa adlaw sa eleksiyon.
Sumala pa kang Davao City Police Office Director Col. Alexander Tagum ang mga bag nga mamahimong masulod ang bomba ang dili tugtan sa mga polling precincts kini subay na sab sa hangyo sa Commission on Elections (Comelec) aron nga mapugngan ang bisan unsa man nga binuhatan sa mga teroristang grupo.
Gihangyo sab sa police director ang mga botante nga motamud sa kamandoan aron nga dili malangan magsulod sa mga presinto.
Gi-andam sab karon sa DCPO ang security measures sa perimeter sa Daniel R. Aguinaldo National High School diin gikatakda usab nga moboto si Pangulong Rodrigo Duterte.
Laoman sab nga dagsaon ang nahisgutan nga tulonghaan nga nahimutang sa Barangay Matina Crossing aron lamang makita si Pangulong Duterte.
Gawas sa eleksiyon, gihan-ay na sab sa kapulisan ang security plan alang sa pag-abli sa klase ingon man ang padayon nga kampanya batok New People’s Army (NPA).
