DAVAO CITY – Gibana-bana nga molungtad hangtud upat ka bulan nga walay supply sa NFA Rice ang davao region.
Sumala kang NFA-Davao Director Dianne Silva hangtud na lamang sa tunga-tunga nga bahin sa bulan sa Marso niining tuig kasamtangan ang supply sa NFA rice sa tibuok nasud.
Dugang pa ni Silva nga kung mahurot na ang NFA rice nga ilang gihatag sa mga retailers wala nay ika-supply nga bag-o ang ilang buhatan.
Labot niini, nanawagan si Silva sa publiko nga sabton ang NFA sanglit wala usab sila nagpasagad sa ilang trabaho ug ilang gihimo ang tanan aron mahatagan ug kasulbaran ang maong suliran.
Gipasabot usab ni Silva nga giproseso na sa NFA ang pag-import ug bugas niadtong oktobre 2017, apan wala kini giaprubahan sa NFA council nga gilangkuban sa economic managers ni pangulong Duterte.
Giangkon sa opisyal nga karon pa mahitabo nga nahutdan sila og bugas sukad sa kasaysayan sa NFA.
