Gikontra sa defense team ni kanhing Pangulong Rodrigo Duterte ang usa ka argumento sa prosecution sa ikatulong adlaw sa Confirmation of Charges Hearing sa ICC!
Giklaro ni Atty. Nicholas Kaufman nga ang “neutralization” sa police operations sa kampanya batok sa ilegal nga droga usa ka pamaagi lamang sa pag-aresto ug wala kini nagpasabot og pagpatay.
Gihimo ni Kaufman ang maong pagpasabot isip tubag sa ebidensiyang gipresentar sa Prosekusyon nga gitawag og “PRRD list,” nga giingong “kill list” sa pipila ka media report.
Sa maong listahan, nalakip sa pipila ka high-value targets si kanhing Albuera Mayor Rolando Espinosa Sr. ug Raul Yap, giila nga “neutralized” o giingong napatay sa operasyon.
Gibarugan ni Kaufman nga mismong testigo sa prosekusyon ang mipasabot nga ang “neutralization” sa police operations nagpasabot og pagdakop ug dili pagpatay.
Matod pa sa abogado , kini usa ka lawful restraint o legal nga pag-aresto o pagpugong sa kriminal ug dili awtomatikong pagpatay .
Gidugang pa niini nga sumala sa duha ka testigo, mahimo lamang gamiton ang lethal force kung ang suspek mosukol ug magbutang sa peligro sa kinabuhi sa mga pulis, subay sa ordinaryong doktrina sa self-defense. Samtang gikanayon usab niini, gipadayag sumala pa kaniadto ni kanhing Philippine National Police chief ug karon Senador Ronald dela Rosa nga ang “neutralization” nagpasabot og pagdakop base sa PNP operational procedure manual.
Gipasabot usab sa depensa nga wala pa magpagawas og ruling ang Korte Suprema sa Pilipinas nga nagdeklara sa drug war nga ilegal, ug wala usab giwala ang bisa sa mga circular sa PNP nga naglangkob sa maong termino.
Apan sumala sa mga testigo sa prosekusyon sa ICC, sa konteksto sa Oplan Tokhang, ang “neutralize” nagpasabot nga pagpatay.
