DAVAO CITY – Gipangandoy gayud sa amahan ni Nesthy Petecio nga maka-angkon ug bulawang medalya ang iyang anak sa nagpadayong Tokyo 2020 Olympics.
Sa pakighinabi sa Bombo radyo, gikanayaon sa amahan ni Nesthy nga si Teodoro Petecio nga positibo siya nga magmadaugon ang iyang anak gumikan sa determinasyon ug sa ka-hanas na niini sa pamoksing.
Hinuon, sumala pa ni Mr Petecio nga dili lamang alang kang Nesthy ang iyang mgha pag-ampo nga makakuha ug medalya kung dili lakip na sa uban pang mga atletang Pinoy nga misalmot sa olimpyada.
Gisaysay pa sa amahan nga sa linghud pang pangidaron nga 11 anyos nagsugod na si Nesthy sa pag-apil sa mga dula sa boxing sa Rizal park dinhi sa dakbayan sa Dabawhangtud nga nakasulod na kini sa national level sa pangidarong 13 anyos, diin kadaghanan sa mga away niini ang daug.
Gani gika-sangka niini sa nakalabay nga mga panahon ang 11 ka lalaki ug 3 ka babaye. Ug tungod sa maayong record niini nakasulod si Nesthy sa Philippine Team sa edad nga 15 anyos.
Dako usab ang pasalamat ni Mr Petecio sa kalampusan nga naangkon sa iyang anak gumikan kay nakapundar na sila ug mga kabtangan ilabi na ang pagpatukod sa ilang nindot nga balay nga adunay marka sa atubangan nga bahin ng “OLYMPIAN”
