DAVAO CITY – Gitimbaya si Davao City Mayor Inday Sara Duterte si Tokyo 2020 Olympics women boxing silver medalist Nesthy Alcayde Petecio diin nagkahinabi ang duruha pinaagi sa Zoom courtesy call kagahapon.
Mismong ang mga Philippine Coast Guard District Davao officials ang nakiglambigit kang atty. Mans Carpio nga maoy nag-arrange sa virtual courtesy call.
Gipasigarbo ni Mayor Inday si Petecio gumikan sa dungog nga gihatag niini sa nasud.
Samtang gibutyag sab ni Nesthy nga mibati sila ug kakulba dihang gihatagan giya ug kahigayonan nga makahinabi sa unang higayon si Mayor Inday.
Kahinumduman nga nahimong kabahin sa siyudad ang Pinay boxer gumikan kay gisagop kini sa Calinan boxing team nga gipaluyohan kaniadto ni anhing Davao City councilor Luis Villafuerte ug coach nga si Jun Israel Sagarino hinungdan nga nakahimo kini pag-compete sa National Amateur Boxing Championships sa Cagayan de Oro City diin midaug kini ug gold medal ug nahatagan ug kahigayonan sa national boxing team sa edad nga 15 anyos.
Nasayran nga si kanhi Mayor ug karon Pangulong Rodrigo Duterte ang nagpalit kaniya ug ticket paingon sa Manila.
Dungan sa iyang kadaugan, duruha ka mga panimalay dinhi sa siyudad ang gihatag kang Nesthy gawas pa sa iyang milk tea business.
