Nag-atubang karon og kaso nga “human trafficking” ang usa ka gikaingon nga negosyante dinhi sa dakbayan sa Davao didto sa kauluhan nga unang mipasang-at og reklamo batok kang Cong. Paolo Pulong Duterte.
Sumala sa taho, opisyal nang misaka sa lebel sa arraignment nga gikatakda sa Hulyo 7, 2025, kini subay pagkumpirma sa Regional Trial Court (RTC) Branch 53 niadtong Hunyo 11.
Subay sa mga rekord, ang usa ka negosyante giila nga si Kristone John Patria nga nag-tubang sa kasong qualified trafficking in persons ubos sa Section 4(a) sa Republic Act (RA) No. 9208 o ang Anti-Human Trafficking in Persons Act of 2003, nga gi-amendahan pinaagi sa RA No. 10361.
Ang nasampit nga kaso ang gipasaka pinaagi sa inquest proceedings sa Philippine National Police, Criminal Investigation and Detection Group sa Regional Field Unit, National Capital Region (PNP-CIDG RFU-NCR).
Subay sa rekord sa korte, si Patria ipailawom sa arraignment alang sa daghang ihap sa qualified trafficking in persons, human sa resolusyon nga gipagawas niadtong Abril 28, 2025, nga nakakita og igo nga basehan aron ipadayon ang kaso ngadto sa pormal nga pagtaral.
Nasayran nga ang reklamo gisang-at sa usa ka pribadong indibidwal nga nakig-alayon sa mga otoridad sa kapulisan ug giduso kini sa Manila City Prosecutor’s Office.
Gibutyag sa reklamo nga si Patria sumala pa ang nagpahigayon sa pag-recruit sa daghang kababayen-an alang sa sekswal nga serbisyo gamit lamang ang cellphone.
Gibutyag usab naaktuhan kini sa entrapment operation nga gipahigayon niadtong Abril 25, human mitanyag ug tulo ka mga babaye alang sa sekswal nga serbisyo sa usa ka hotel ug nadawat ang marked money isip bayad.
Samtang mikumpirma usab ang presensya sa ultraviolet powder sa iyang mga kamot tungod sa pagdawat sa salapi.
Sumala pa sa mga otoridad, ang mga gihimo sa gikaingong “Bugaw” nagtumong sa large-scale ug qualified trafficking in persons, tungod daghang kababayen-an ang nalambigit.
Ang transaksiyon gipahigayon pinaagi sa mobile communication, ug klaro sumala pa ang pagpahimulos sa kahuyang sa mga biktima.
Samtang gikabutyag usab nga adunay mga testigo nga mitudlo kang Patria isip tawo nga nakigkontak ug nagrekrut kanila, nga nagtanyag og bayad tugbang sa pakighilawas.
Dugang pa sa mga otoridad nga ang gihimo sa suspetsado adunay porma sa prostitusyon ug sekswal nga usa ka pagpahimulos ubos sa balaod.
Kahinumduman nga una na usab nga nagpasaka og reklamo ang nahisgutan gumikan sa insidente niadtong Pebrero 2025, tungod sa pagkulata kaniya sa usa ka bar sa Obrero ning dakbayan sa Davao, ug ang video niini mikuyanap sa social media sa wala pa ang eleksyon ug gitumbok niini si Congressman Pulong Duterte.
