Magpahigayon ang Senado og necrological service alang sa nipanaw nga kanhing Senate President Juan Ponce Enrile sa Miyerkules, Nobyembre 19.
Ang necrological service pagahimoon sa Session Hall sa Senado sa alas-9 sa buntag.
Bugtong ang mga imbitadong personahe ug awtorisadong personnel lamang ang pasudlon sa hall.
Sa dili pa magsugod ang necrological service, pagahimoon ang arrival honors alang sa kabaong sa patayng lawas sa mipanaw nga Senate President sa alas-8:45 sa buntag.
Kahinumdoman nga mipanaw si Enrile niadtong Huwebes, sa edad nga 101, human sa pakigbatok sa sakit nga pneumonia.
Si Enrile usa sa labing dugay nga nagsilbi sa gobyerno sa Pilipinas, nga adunay kapin sa pito ka dekada sa serbisyo publiko.
Ilado siya nga usa ka prominente nga legal ug political figure, nga nalambigit sa mga makasaysayanong kalihokan sa nasod gikan sa Martial Law sa panahon ni kanhing Pang. Ferdinand E. Marcos Sr., hangtod sa EDSA People Power Revolution niadtong 1986 diin siya mitalikod sa rehimeng Marcos.
Nagsilbi siya isip Justice Secretary (1968–1970) ug Defense Minister (1972–1986) ug pipila ka higayon nga nahimong senador. Niadtong 2008, napili siya nga Senate President ug nagsilbi hangtod 2013.
Bisan pa sa iyang pangidaron, nagpabilin siyang aktibo gihapon sa politika, ug ang kataposang posisyon niini mao ang Chief Presidential Legal Counsel sa administrasyong Bongbong Marcos.
Misulay usab siya sa pagdagan sa pagka-presidente sa nasod apan wala kini makadaog.
Sa iyang pagpanaw, natapos ang usa ka makulay ug kontrobersyal nga kapitulo sa kasaysayan sa politika sa Pilipinas.
