DAVAO CITY – Nangandam na ang National Commission for Indigenous People’s (NCIP) eleven alang sa mga posibling mopasaka ug kaso sa mga tawo nga migamit sa ilang bisti sa mga pasundayag nga wala’y tukma nga pagpananghid.
Kini ang gihatagan ug katin-awan ni Aty. Geroncio Aguio, ang director sa NCIP Eleven.
Sumala pa kaniya nga dinhi na angayan nga timbang-timbangon ang kalabot sa freedom of expression ug ang pagtahod sa mga tribu nga gi-representahan atol sa mga panundayag.
Hinoon gitataw ni Atty. Aguio nga sa pagkakaron wala pa’y miduso ug reklamo, apan gipa-andam na ang abogado sa komisyon alang sa posibling moduso ug kaso.
Sumala pa kang Aguio nga bisan kung ang tumong gayud unta mao ang pag-edukar sa mga turista ug mga bisita apan naulawan na hinoon ang tribu angayan gayud kini nga suta-on aron nga dili makamugna na hinoon ug dili pagsinabtanay.
Una nang gipanalipdan sa mga organizers sa 34th Kadayawan sa Dabaw ang delegasyon gikan sa Bislig nga mao ang nahimong champion sa Open Category gumikan sa paghulagway sa usa ka tribu.
Nahimo lamang kini nga kontrobersya sa dihang nakita ang mga sampot sa mga lalaki nga mga dancers nga nanagsul-ob lamang ug mga bahag ug beads.
