Gipasalig ni Atty. Arcelito Albao ang seryosong paglusad og mga operasyon sa tumong nga makita ug madakpan si Pastor Apollo Quiboloy.
Kini human sa niguwa nga mga alegasyong binayran kini sa pastor rason nga for show na lamang matud pa ang pagserve niini og warrant of arrest sa Kingdom of Jesus Christ Compound, Buhangin, ning dakbayan atong nakalabayng adlaw.
Atol sa pagkighinabi sa Bombo Radyo Davao ngadto kay Atty. Arcelito Albao, Regional director sa NBI XI, gipanghimakak sa opisyal ang alegasyon ni Arlene Stone, kanhi miyembro ng KOJC nga matud pa kalakip kini sa natagaan og envelope sa pastor rason nga andam kining panalipdan ang gikahimutangan niini.
Alayon niini, nakaandam si Albao nga mokooperar kung aduna may imbestigasyon nga ipahigayon.
Sa pikas bahin, giangkon sa opisyal nga aduna gayuy kadak-on ang mga propiedad ni Pastor Apollo Quiboloy rason nga dili tanang dapit niini ang ilaha nang naadtoan.
Hinoon, posible matud pang mopahigayon usab sila og pagserve og warrant of arrest kay Pastor Apollo Quiboloy sa Prayer Mountain sa Tamayong ug naghulat lamang matud pa sila og kamandoan gikan sa taas.
Masaligon sab si Albao nga wala pa nakagawas sa nasud ang Pastor gumikan wala kini record.
Ning kasamtangan, giawhag sa opisyal ang mga myembro sa KOJC nga tabangan ug hangyo ang pastor nga magpakita na lamang aron matubag ang mga alegasyong ginapasaka batok kaniya.
