Gisugdan na sa National Bureau of Investigation (NBI) ang pag-imbestiga sa 18 ka mga indibidwal nga nagpaila nga mga kanhi sundalo ug giingong mga kanhing personahe ni kanhi Zaldy Co.
Kini gikumpirma mismo sa bag-ong direktor sa ahensya nga si Atty.Melvin Matibag atol sa press briefing.
Sumala kaniya, ginalan-aw na nila ang pagkatao o “background” sa maong grupo human sa ilahang kalit nga paglutaw ug pag-atubang sa publiko bag-ohay lamang.
Matud ni Matibag, importante nga masuta ug ma-imbestigahan ang grupo tungod sa ilahang gibutyag nga mga akusasyon ug alegasyon batok sa pipila ka mga opisyal o personalidad.
Gibutyag niini nga kinahanglan susihon pag-ayo ang kredibilidad sa mga nagpailang kanhi sundalo aron matino ang kamatuoran sa ilahang mga pasangil.
Dugang pa niya, dako’g epekto ang ilahang pagkatao ug nangaging rekord, ilabi na kon adunay mga karaang kaso nga mahimong makaapekto sa kalig-on sa ilahang testimonya.
Bisan paman niini, gisiguro sa NBI nga balanse ang ilahang pagtan-aw ug pag-imbestiga sa maong isyu.
Gibutyag usab ni Matibag nga gikinahanglan gihapon masuta ang ilahang background aron masukod ang kredibilidad sa ilang mga pahayag.
Sa laing bahin, andam na ang NBI nga motabang sa pagpanubag sa mga opisyal nga giakusahan og ilegal nga kalihokan, kon mapamatud-an nga adunay kredibilidad ang testimonya sa 18 ka mga giingong kanhing sundalo.
Gihangyo usab sa direktor ang grupo nga mosumite og joint affidavit sa opisina sa NBI aron pormal nga masusi ug maimbestigahan ang ilahang mga alegasyon.
