Gihuptan na sa Oklahoma City Thunder ang 3-2 lead, human gidomina ang Game 5 sa NBA Finals batok sa Indiana Pacers.
Wala nakabangon ang Pacers sa 14-point half-time deficit, bisan nga gipugos sa team nga makabawi sa 2nd half sa dula.
Morag gidimalas ang all-around star sa Pacers nga si Tyrese Haliburton og walay napasulod nga score sa unang katunga nga parte sa dula.
Bisan tuod misulay siya pagbawi niini sa ikaduhang bahin, nalimitahan lang siya sa 4 points sa kinatibuk-an, uban ang unom ka rebounds ug unom ka assists.
Sa pikas bahin, nagbuhos si Thunder forward Jalen Wiliams og 40 big points samtang 31 points og 10 assists usab ang nahimong kontribusyon sa guard nga si Shai Gilgeous-Alexander.
Nakigbisog pag-ayo ang Pacers sa bug-at nga depensa sa Thunder, diin ang Thunder miposte og 12 ka blocks sa kinatibuk-an samtang upat lang ang nahimo sa Pacers.
Ang Thunder nakailog usab og 15 ka steals samtang napugos ang Pacers sa paghimo og 22 ka turnovers sa kinatibuk-an.
Bisan pa niini, mas taas gihapon ang overall shooting percentage sa Pacers tungod kay nakamintina sila og 45.1% overall shooting samtang ang Thunder nakakuha lang og 42.6%.
Sa kapildihan sa Pacers, nausik ang 28 points ni NBA champion Pascal Siakam, uban ang 18 points gikan sa bench player nga si T.J. McConnell.
Ang Game 6 mobalik sa Indiana diin ang Pacers gipaabot nga mosuway sa pagtabla sa dula sa 3-3.
