DAVAO CITY – Gihupay sa Naval Force sa Eastern Mindanao (NFEM) ang kahadlok sa publiko kalabot sa presensiya sa Chinese research vessel nga midunggo dinhi sa dakbayan niining milabay nga adlaw.
Matud pa kang Command Chief Captain Ramil Roberto Enriquez, ang MV Yuan Wang 3, usa ka state-owned Chinese vessel, ang mibisita sa dakbayan alang sa replenish sa ilang probisyon sama sa pagkaon ug gasolina.
Gani gi-monitor na matud pa nila ang maong vessel samtang naglawig kini sa Balut Island Sarangani, Davao Occidental.
Nakasulod sumala pa ang mga nahisgutan dinhi sa dakbayan kini tungod misumite sila ug mga gikinahanglan nga permits.
Gitino sab ni Enriquez nga dili sumala pa kini navy vessel ug una na matud pa kini nga mibisita sa siyudad kaniadtong tuig 2010.
Kahinumduman nga una na sab nga mitugpa sa dakbayan ang Chinese military transport aircraft Ilyushin Il-76 sulod sa pipila ka higayon sa Davao International Airport sa milabay nga bulan aron nga magpagasolina.
Apan gitino ni Enriquez nga ang nahisgutan nga Chinese aircraft ang padulong sumala pa sa New Zealand.
Samtang gibutyag sab ni Michael Lasa, harbour master sa Philippine Ports Authority-Davao, nga dili lamang ang nahisgutan nga barko ang nakbisita dinhi sa dakbayan kung dili lakip na sab sa uban pang kanasuran sama sa Japan, Australia, ug Korea.
