DAVAO CITY – Misaka karon ang kaso sa mga natalang sunog sa dakbayan apan ubos sumala pa ang mga propedad nga gilayon sa kalayo.
Nasayran nga luyo sa nasinatian nga krisis sa covid-19, taas pa gihapon ang kaso sa Non-structural Fire kini base sa gipagula nga datos gikan sa Bureau of Fire Protection of BFP-Davao.
Sumala pa kang SF03 Ramil Gillado, BFP Davao Operations head, nga sukad Enero hangtud Mayo ning kasamtangan nga tuig, anaa sa 8,677,800 pesos ang natalang damaged to property kung itandi sa susamang panahon kaniadtong 2019 nga anaa sa P45,686,100.
Gitataw ni Gillado, nga ang pag-ubos sa kaso sa structural fire tipik lamang sa epektibo nga pagpatuman sa Oplan Ligtas Pamayanan program sa mga barangay, ug ang pagpabilin sa mga tawo sa pinuy-anan tungod sa COVID-19, hinungdan nga paspas nga na-report ang kaso sa sunog.
Tungod niini, napugngan ang padako sa sunog samtang ang uban niini mapakgang gilayon ayha pa man miabot ang mga responder.
Apan luyo sa pag-ubos sa insidente, misaka sab ug dyutay ang kaso sa Non-structural fire gikan sa 263 kaniadtong January hangtud May 2019 sa 265 sa susama nga bulan karung tuig 2020 gumikan kay nadugang sa datos ang grass fire ug pagsunog sa mga basura.
