Gideklara sa nasud France ang monkeypox outbreak diin gikumpirma sa mga health officials sa nahisgutang nasud nga duna nay natalang 2,171 ka mga kaso niadtong Martes, Agosto 2.
Sa pakighinabi sa Bombo Radyo Davao ngadto kang Bombo International Correspondent Dick Villanueva, katunga sa mga kaso niini ang nanukad sa mismong sentro sa nasud nga Paris.
Nagpahigayon na og mga vaccination drives diin gamiton isip depensa kontra moneypox ang bakuna batok small pox.
Mabakunahan lamang ang pasyente kung rehistrado kini sa Doctolib, usa ka pribadong website nga ginagamit sa mga lokal nga residente sa France aron makapa-book og appointment.
Ang mga kawani sa reception desk magpa-fill-up sa pasyente og questionnaire ug mag-verify sa ilang pagkatawo, bisan pa nga ang mga pasyente wala kinahanglana nga adunay reseta sa doktor aron mabakunahan.
Ang gobyerno sa France nag-ingon kaniadtong miaging semana nga ilang palihokon ang ilang mga tawo aron matabangan ang pagdumala sa mga bakuna, lakip ang mga doktor, nurse ug mga estudyante sa medisina.
Kung nabakunahan na ang mga pasyente, ma-book sila alang sa ikaduha nga appointment sa sulod sa 28 ka adlaw, bisan paman nga giingon sa mga health authorities nga posibleng mapalapdan pa ang limitasyon niini.
Kung magpakita ang pasyente og senyales sa maong sakit, ipailalom kini sa quarantine hangtud sa upat ka semana.
Gipahayag sab ni Villanueva nga dunay tulo ka tawo sab ang nataptan og monkeypox sa nasud Cyprus. Hinoon, walay mga Pilipino sa mga nahisgutang nasud ang nakahiagum sa maong sakit apan giabisuhan na sa mga embahada ang atong mga kababayan nga kanunay nga mag-igmat.
Via || LJ Florendo
