Wala gisalikway sa National Bureau of Investigation (NBI) ang posibilidad nga makaapekto sa umaabot nga eleksyon ang mga datos nga nakuha sa nadakpan nga Chinese national nga adunay dala nga spy equipment.
Gibutyag sa tigpamaba sa NBI nga si Spokesperson Ferdinand Lavin nga posibleng maimpluwensyahan ang resulta sa eleksyon tungod sa kagamitan nga gigamit sa maong insidente.
Ang nasakmit nga gamit mao ang gitawag nga IMSI catcher o International Mobile Subscriber Identity, nga makasagap ug makakuha og impormasyon, lakip ang mga personal nga mensahe nga anaa sa cellphone sa usa ka indibidwal.
Pahayag pa ni Lavin, kung mapamatud-an nga kini nga device nakakuha o nakatago sa mga sensitibong datos, posible kining manipulahon ug gamiton aron maimpluwensyahan ang resulta sa eleksyon.
Sa ilahang pakighinabi sa giilang Chinese spy, miangkon si Lavin nga pagkahuman sa pagpasabot sa iya sa iyahang mga katungod isip dinakpan, dili na kaayo mutubag sa ilahang mga pangutana.
Gipasabot usab ni Lavin nga kung unsa kalapad ang coverage sa maong spy equipment. Matud niya, gikan sa 500 metros hangtod 3 kilometros nga radius, makasagap gihapon kini og impormasyon gikan sa mga mobile gadget, nga kasagaran adunay personal nga datos sa tag-iya.
