Gimando sa National Police Commission (Napolcom) ang pagsang-at og kasong administratibo batok kang Patrolman Francis Steve Fontillas tungod sa iyang partisanong pamahayag human sa pag-aresto kang kanhi Presidente Rodrigo Duterte.
Sumala ni Napolcom Commissioner Rafael Vicente Calinisan, nakalapas si Fontillas sa Primer on Personnel Decorum, Code of Ethics sa PNP, ug ubang patakaran tungod sa iyang paggamit sa social media aron sa politikanhong katuyoan.
Gibutyag sa opisyal nga ang mga post ni Fontillas klarong “malicious ug criminal in nature” tungod kay posible kini nga mokwalipikar sa inciting to sedition.
Bisan pa adunay katungod sa pagpahayag ang mga pulis, adunay limitasyon kini, ilabi na nga gikinahanglan silang magpabiling neutral aron mapreserbar ang pagsalig sa publiko sa ilang pagka-impartial.
Tungod niini, gipahimangno sa Napolcom nga ang mga uniformed personnel kinahanglan magpabiling apolitical ug molikay sa mga buhat nga makadaot sa ilang kredibilidad.
Gibutyag ni Calinisan nga aduna’y bug-at nga silot alang sa mga molapas sa election laws, civil service rules, ug mga polisiya sa Napolcom ug PNP.
