DAVAO CITY – Subling na sab nga gipa-agi-an ang nangliki nga pedestrian overpass sa JP Laurel Avenue doul sa GMall sa dalang Bajada, ning dakbayan. Una nang gitataw ni Den Ortiz, tigpamaba sa Department of Public Works and Highways (DPWH) Eleven nga wala’y angay nga kabalak-an ang publiko nga mahugmak ang overpass gumikan kay lig-on ang pagkabuhat niini ug gamay lamang nga suliran ang nakita nga mga liki.
Ang pedestrian overpass sa JP Laurel Avenue gibana-bana nga mga kinse ka tuig na sukad nga kini natukod. Pre-fabricated type ang pagkahimo niini hinongdan nga gipangtakdo lamang sa dihang gitaud na.
Ang nasemento nang daan nga hangdan gibuhosan ug semento hinongdan nga nahulma nga daw mga liki paglabay sa mga katuigan.
Mihimo na ug inspection ang District Engineering Office sa DPWH ug gipangbakbak ang mga nakita nga liki ug gipang-ilisan ang mga gitaya ug nangadaut na nga mga puthaw.
Sumala pa kang Ortiz nga bisan kung na-expose ang mga kabilya, anaa pa gihapon ang kalig-on sa overpass.
Bisan pa sa pasalig sa DPWH anaa pa gihapon ang kabalaka sa mga motorist nga mahugmakan sila samtang anaa ilalum sa nahisgutan nga pedestrian overpass.
