Nabalaka ang Department of Health (DOH) sa Davao Region gumikan sa pagsaka sa kaso sa mga nangamatay nga adunay kalabotan sa rabies.
Sumala pa sa DOH-Davao Region, nga sa paghuman sa tuig 2024 nakatala ang ahensya og 36 ka mga indibidwal nga namatay gumikan sa rabies, mitaas sumala pa ang ihap gikan sa 24 kaniadtong tuig 2023, giawhag sa ahensya ang mga lokal nga panggamhanan sa Davao Region nga magpatuman og mga lakang aron nga mapugngan ang pagsaka sa maong ihap.
Gikataho ni Undersecretary Abdullah Dumama Jr., DOH Area for Mindanao Concurrent Head, nga gikan sa 36 nga mga kamatayon, 23 niini ang may kalabotan sa mga hayop nga domestic, samtang 13 ang gikan sa mga saag nga hayop.
Ang kaso nga adunay kalabotan sa rabies gilangkoban sa tibouk rehiyon, diin ang Davao del Norte ang mitala sa labing dako nga pagsaka nga anaa sa sumala pa 333 porsyento nga pagsaka.
Ang mga biktima anaa sa pang-edaron nga 5 hangtod 68-anyos.
Gibutyag usab sa regional director nga ang rehiyon nakadawat og Sub-Allotment Advice (SAA) gikan sa central office alang sa mga anti-rabies nga bakuna nga nagkantidad og P8 milyon, nga katugbang sa 7,000 ka vials.
Apan, gipaklaro niini nga ang maong kadaghanon dili igo aron matubag ang nagatubo nga kaso sa mga napaakan og hayop, nga miabot na og 120,000 sa 2024.
Samtang, alang usab sa 2025, ang rehiyon gitaganan og SAA nga nagkantidad og P1 milyon, o 1,500 ka vials.
Gipasabot usab ni Dumama nga ang mga lokal nga gobyerno (LGUs) sumala pa ang responsable sa pagkuha og dugang nga mga bakuna, ug kinahanglan ang DOH maghatag og dugang nga suporta niini.
Dugang pa sa opsiyal, nga ang DOH nakigtambayayong na sa Department of Agriculture (DA) aron mapalig-on ang mga lakang sa pagbakuna ug mapakusgan pa ang pagpahibalo bahin sa paglikay sa rabies.
Nagpasidaan usab si Dumama sa publiko batok sa mga delikadong tradisyonal nga pamaagi, susama sa “tandok,” nga ginagamit pa gihapon sa ubang lugar aron tambalan ang maong rabies.
Dugang pa niini, nga ang mga indibidwal nga mapaakan o makambrasan sa mga hayop kinahanglan nga hugasan dayon ang samad gamit ang sabon ug tubig, dayun nga magpa-konsulta sa mga Animal Bite and Treatment Centers (ABTCs) sa rehiyon.
