Nagmalampuson ang usa ka inter-agency rescue operation sa Samal human masalbar ang usa ka babaeng Green Sea Turtle nga gibana-banang 56 kilos ang gibug-aton. Ang maong pawikan, nga usa ka endangered species, napalgan nga nagluya ug adunay samad sa baybayon sa Purok 5, Barangay Tagpopongan, Babak District, Island Garden City of Samal.
Giduso ang maong kalihukan pinaagi sa pakigtambayayong sa Coast Guard Station IGACOS, 802nd Squadron sa Philippine Coast Guard Auxiliary (PCGA), ug lokal nga mga ahensya. Nitabang usab sa operasyon ang City Environment and Natural Resources Office (CENRO), City Veterinary Office sa pagpanguna ni Dr. Edunel C. Sala, ug Fisheries Division sa City Agriculture’s Office.
Aron maatiman ug marekober ang kahimtang sa hayop, gidala kini sa Cleanergy Park sa Punta Dumalag, Matina, Davao City diin ang opisyal nga rehabilitation center alang sa mga nasalbar nga pawikan sa rehiyon. Gipadayag sa mga otoridad nga kini usa ka hinungdanong lakang sa pagpanalipod sa mga marine species nga padayong nangawala.
