Nakadawat og tawag ang buhatan sa Malalag Municipal Police Station gikan sa RMFB 11 Personnel nga nadestino sa Border Control Point, Baluyan, Brgy. Bolton, Malalag, Davao Del Sur, nga aduna sumala pay nakita niini nnga patayng lawas ngadto sa usa ka abandonadong establisyemento, hinungdan nga dali sab gilayon nga girespondihan sa mga sakop sa Malalag PNP.
Subay sa gilusad nga imbestigasyon, aduna matud pay nakakita sa maong patayng lawas mga pasado alas 12 ang takna sa udto kagahapong adlawa, diin nakita niini nga naghapa ang plastada sa maong biktima og gituohang wala nay kinabuhi.
Ang maong biktima, nasayran nga usa matud pa kini ka lalake, diin gibanabanaang anaa sa sakto na sumala pa ang kadak-on sa panglawas, ug adunay tattoo sa bukton nga dili na sumala pa mabasa.
Nakahiagum og daghang samad-dinunggaban ang maong patayng lawas sa usa ka lalake, diin gituohan sab kining igo lamang gayud kining gilabay nga daw murag mananap human kini gipatay.
Sa karun, padayon pang ginapalawoman sa mga otoridad ang ginahimo niining imbestigasyon, ingun man ang pagkatawo sa maong biktima ug ang hinungdan sa kamatayon niini, samtang ang patayng lawas gidala na sab sa punirarya sa maong dapit.
