DAVAO CITY – Body parts nga nakaplagan sa baybayon sa Island Garden City of Samal wala pa maila.
Padayon pa ang imbestigasyon nga gilusad sa Island Garden City of Samal sa pagpanguna ni Supt. Giussepe Geralde, hepe ng Island Garden City of Samal police ang pagkatawo sa chop-chop nga bahin sa lawas sa tawo nga napadpad sa baybayon sa Island Garden City of Samal.
Sumala sa IGACOS Police Chief ang mga nakaplagan nga mga body parts mao ang tuo ug wala nga mga tiil.
Ang wala nga tiil tibouk pa ug nadugtong pa sa dapit sa hawakan sa biktima, samtang ang tuo nga tiil putol gikan sa tuhod paingon sa lapalapa na lamang.
Duna pa’y sul-ob nga floral nga skinny jeans ang wala nga tiil sa biktima.
Gumikan niini padayon ang panawagan sa IGACOS PNP sa mga nawad-an ug mga kabanay nga gilayon nga makig-alayon sa mga tinugyanan sa balaod aron sa pag-ila sa biktima.
Usa ka Roly Cortez, pintor, ang nakakita sa putol nga bitiis sa baybayon doul sa ilang bahay sa Purok 1-A, Barangay Limao, Samal.
Gilayon nga gipahibalo sa mga residente sa mga tinugyanan sa balaod ang nakaplagan nga bahin sa lawas.
Human ang kapin usa ka oras, nakaplagan sab sa usa ka Lideon Anggon ang bahin sa pelvic bone hangtud sa lapalapa nga naglutaw-lutaw sa kadagatan nga bahin hadoul sa usa ka resort sa Purok 7-B, Barangay Limao.
Nakaplagan kini kapin usa ka kilometro ang gilay-on gikan sa putol nga bitiis.
Sa gipahigayon nga eksaminasyon ni Dr. Petronela Ferrer, City Health Officer, posible sumala pa nga gitadtad ang lawas sa biktima gamit ang mahait nga butang.
Gikompirma sab sa doktor nga lalaki ang biktima.
Sumala pa kay Supt. Geralde nga padayon ang pakiglambigit sa kapolisan sa pipila ka mga barangay ug kasikbit nga kalungsuran aron sa pagseguro kung dunay mga tawo nga natigwala-an sa ilang dapit.
Padayon pa ang pagpangita sa uban pa nga bahin sa lawas sa biktima nga posibleng naglutaw-lutaw pa sa kadagatan sa Samal.
