DAVAO CITY – Balhug sa bilanggo-an ang Digos City PNP ang usa ka hamtong nga lalaki human kini makadunggab kagabii gumikan sa naghinobra nga kahubogm ug natripan niini ang iyang silingan.
Naila ang biktima nga usa ka Eziekel Blanco Morales, 53 anyos, residente sa sitio Kawayan, Barangay Matti, dakbayan sa Digos.
Nasayran nga mga alas sais ang takna sa kagabhi-on, samtang ang nahisgutan nga suspek nag-inum-inum sa tindahan sa iyang silingan, ug nagkanta-kanta sa vedeoke, apan ang anak sa tag-iya sa tindahan nga mao ang usa ka Melchor Bangcaya Merlie, 20 anyos, ulitawo nagtan-aw lamang sa suspek.
Miinit ang ulo sa suspek, mikuha ug kutsilyo ug gihansakan ang biktima, nga naka-angkon ug samad dinunggaban sa iyang tiyan nga bahin.
Dali nga miikyas ang suspek, apan pipila ka minuto ang milabay mitahan kini ngadto sa ilang barangay tanod, ug gi-edorso sab ngadto sa Digos City PNP, lakip na ang kutsilyo nga gigamit sa pagpangdunggab.
Nasayran nga dali nga gitabang sa iyang mga ginikanan si Melchor, ug gidala sa Davao del Sur Provincial Hospital apan gumikan kay kritikal ang kahimtang, hinongdan nga gibalhin sa Southern Philippines Medical Center (SPMC).
Gihikay na karon ang kaso batok sa suspetsado.
