DAVAO CITY – Mihangyo karon ug hinabang ang mga bakwit nga gikan sa Marawi City nga kasamtangang nahimutang sa pipila ka mga Barangay sa Digos City kini human nga wala na matud pay makaon ang mga nahisgutan.
Kahinumduman nga anaa sa halos 80 ka mga indibidwal ang miadto sa Department of Social Welfare and Development (DSWD) sa provincial Capitol sa Digos aron nga mangayo ug hinabang human nga pipila kanila ang walay kaon sulod na sa pipila ka adlaw sukad nga miulbo ang kagubot sa Marawi City tali sa tropa sa kasundalohan ug teroristang Maute.
Sagad sa mga nahisgutan ang nahimutang karon sa ilang mga paryente sa Sitio Power Barangay Tres de Mayo, Barangay Zone 1 Digos ug Brgy. Aplaya sa nahisgutan nga lugar diin kadaghanan niini mga bata ug tigulang.
Gimandoan na sab ni Mayor Joseph Peñas ang otoridad nga magpahigayon una ug pro-filing sa mga bakwit aron masiguro nga walay terorista nga nasagol sa mga nahisgutan ug aron nga mahatagan gilayon sila ug hibabang.
