Nadakpan sa mga kapulisan ang usa ka Police Staff Sergeant nga si alyas “Jhun” human nga kini ang nagpabuto og pusil samtang anaa kini sulod sa usa ka balay nga adunay nahitabong bunyag nga okasyon.
Subay sa report gikan sa Los Amigos Police Station, nahitabo ang pagpabuto og armas pasado alas Siete kagabii sa Purok 5-A, Brgy. Los Amigos, Tugbok district ning dakbayan sa Davao diin gipahigayon ang usa ka selebrasyon usa ka bunyag sa anak sa iyahang higala.
Sumala pa sa imbistigasyon, adunay nakalalis ang suspetsado nga hubog sumala pa niadtong tungura apan sa kainit sa maong sitwasyon nagpabuto kini sa iyahang pusil nga nga gitumong sa yuta nga nakahatod og kahadlok og kabalaka sa mga bisita niadtong tungura.
Tungod niini, dali nga girespondehan ang maong panghitabo og gidala sa presento sa kapulisan ang usa ka pulis ingon man ang usa ka sibiliyan nga nakalalis niini.
Samtang narekober usab sa nahisgutan ang Glock 17 Gen. 4 pistol. Sa pagkakaron, napasakahan na og kaso ang usa ka pulis nga alarm and scandal ug kasong administratibo. Samtang hugot usab nga gikondena sa Davao City Police Office ang gihimo sa Police Staff Sergeant.
Sumala pa ni Col. Hansel Marantan nga walay luna sa ilahang han-ay ang gihimo sa ilahang kaubanan ug wala niini gina-tolerate ang maong batasan. Gipasalig usab niini nga mag-atubang kini og mga kaso gumikan sa iyahang gihimo.
