DAVAO CITY – Nagpahigayon ug nagkadaiyang gimik ang mga sakop sa otoridad dinhi sa dakbayan atol sa kasaulogan sa Valentines Day kagahapong adlawa kini human nga nanghatag ang mga nahisgutan ug bulak ilabi na sa mga kababaenhan.
Pipila sa mga nakadawat kadtong milatas sa mga checkpoint sa siyudad diin ang mga kababaenhan ang nakadawat ug rosas.
Nasayran nga anaa sa kapin 1,400 ka mga rosas ang napanghatag sa mga personahe sa Task Force Davao (TFD) sa nagbantay sa checkpoint nga pasulod sa dakbayan.
Sumala pa kang Col. Darren Comia, TF commander, nga gibutang nila sa gipanghatag nga rosas ang mga numero nga mamahimong tawagan sa publiko sa higayon nga adunay mga kadudahan nga mga butang o tawo sa palibot nga mamahimong hulga sa seguridad sa katawhan ug sa dakbayan.
Gawas sa kasundalohan, una na sab nga nanghatag ug bulak ug teddy bear ang mga personahe sa nagkadaiyang police station sa dakbayan.
