Gilunopan ang pipila ang mga residente sa Lapuan, Don Marcelino, Davao Occidental kagahapon sa gabii, gumikan sa makusog nga bundak sa ulan sa maong dapit.
Subay sa usa ka video nga gi-upload sa usa ka uploader nga residente ra usab sa maong dapit, makita niini nga adunay gi-rescue sa mga silingan ra sab niini nga pipila ka mga indinbidwal nga dili makaagi, gumikan nababagan kini sa naguba na niining gate tungod sa kusog nga bul-og sa tubig baha.
Lakip sa giluwas gikan sa maong pagbaha ang usa ka binuhing baboy sa silingan. Nasayran nga kagahapong adlawa, giulan ang dakong bahin sa Davao Region, gumikan sa nasinatian niining weather system nga Intertropical Convergence Zone (ITCZ).
Samtang, pipila ka mga baragay sab sa Mati City, Davao Oriental, ang nakasinati og pagbaha ug landslide gumikan sa kusog sab nga bundak sa ulan.
Subay sa report gikan sa Mati City Information Office, pipila sa mga dapit nga apektado mao ang Purok Panaghiusa, Barangay Tamisan; Centro, Barangay Bobon; Purok 1 and 2, Barangay Mamali; at Purok Silad, Barangay Macambol.
Sa karun, padayon ang mga panawagan sa mga hingtungdang ahensya ngadto sa mga residente nga mamahimong apektado sa mga pagbaha ogaling adunay mga makusog nga pag-ulan, nga kanunay nga mag-amping ug mag-igmat aron nga makalikay ang kaugalingon sa mga posibleng kapeligrohan.
