DAVAO CITY – Padayon karon nga nadungagan ang kaso sa mga nagka-diarrhea sa pipila ka mga barangay sa Caraga Davao Oriental. Sa ulahing gipagula nga datus si Dr. Chris Anthony Limen, Municipal Health officer sa lalawigan, mikabat na karon sa 426 ang ilang natala nga mga naapektohan.
Pinakadaghan niini ang sa Brgy. Santiago nga anaa sa 417, tig-duha sa Barangay San Miguel, Brgy. San Jose ug sa Brgy. PM Sobrecarey.
Samtang tag-usa sa Brgy. Poblacion, Brgy. T. Pichon, ug Brgy. DL Balante.
Sa nahisgutan nga ihap, mikabat sa 30 ka mga kaso ang sa mga nag-edad ug 60 anyos pataas; anaa sa 156 sa mga nag-edad ug 15 paubos samtang 240 sa mga nag-edad ug 16 hangtud na sa 59 anyos.
Hinuon aduna nay miadto nga hinabang sa lugar nga gilangkuban sa mga nag-unang panginahanglanon sa mga pasyente. Gihulat na lamang sa karon ang resulta sa rectal exam sa pipila ka mga pasyente.
Kahinumduman nga ang tubig sa lugar ang gitudlong hinungdan sa outbreak gumikan kay kontaminado kini sa cholera nga maoy hinungdan sa outbreak sa lugar.
Pipila sa mga pasyente ang anaa lamang sa ilang panimalay apan padayon nga gimonitor samtang ang uban ang anaa sa balay tambalanan ilabi na kadtong grabe ang kondisyon gumikan sa dehydration.
