DAVAO CITY – Girekomenda karon sa Tugbok PNP ngadto kabanay sa 67 anyos nga lalaki kinsa nakaplagan na lamang nga walay kinabuhi nga ipailalom sa otopsiya ang patay’ng lawas niini aron nga masayran ang hinungdan sa kamatayon niini.
Kahinumduman nga sa inisyal nga imbestigasyon sa otoridad, posibleng tungod sa grabe nga pag-inom ug alak ang hinungdan nganong nakabsan sa kinabuhi ang biktima nga nailang si Dalmacio Cusai, residente sa Purok 8 Brgy. Los Amigos Tugbok District.
Gikanayong nakita na lamang nga nagbuy-od ang nahisgutan sa iyang silingan kilid sa usa ka multi-cab hinungdan nga mitawag kini sa 911 hinungdan nga miresponde gilayon sa lugar ang mga sakop sa kapulisan.
Dihang gihiling si Cusai, nakutloan na kini sa iyang kinabuhi.
Walay nakitang foul play ang otoridad sa kamatayon sa biktima nga kasamtangang gipahiluna sa usa ka lokal nga punerarya sa nahisgutan nga lugar.
