DAVAO CITY – Pasakahan ug kasong kalapasan sa Presidential Decrees 1602 (Billiard Game) ug kalapasan sa Executive Order 47-A, Sec. 2(c) “Physical Distancing” ang iduso batok sa siyam ka mga indibidwal nga nadakpan sa otoridad human nga nag-billiard.
Una ng nakadawat ug impormasyon ang mga sakop sa Anti- Illegal Gambling Task Force sa Toril PNP kalabot sa mga nagdula ug billiard sa Virgin delos Remedios St., Crossing Bayabas, Toril, Davao City hinungdan nga malampuson nga nasikop ang mga dinakpan nga nailang sila si GERALD HAMOT RUBIO, 25 anyos, adunay ka-live in, security Guard ug residente sa P-3, Eden, Toril, Davao City, GEORGE ROMA ANDUJAR, 50 anyos, minyo, driver ug residente sa P-8, Lubogan, Toril, Davao City, ARTEMIO IBAG PINONGPONG, 55 anyos, minyo, mananahi ug residente sa P-16, Lubogan, Toril, Davao City, RANIE ORTIZ CABASAS, RUSTICO TAN PEDROS, LARRY BALUYOT NAHINE, GEMAR GONE ARENDAIN , RODNEY PALMERO RUBIO ug NUMERIANO ATTO BAHUYA.
Akto nga nadakpan ang mga nahisgutan nga nagdula ug billiard ug narekober sa otoridad ang patad. Tin-aw sumala pa nga nakalapas ang mga dinakpan EO No. 47-A gumikan kay wala gituman sa mga nahisgutan ang “Physical Distancing”.
Narekober sa mga dinakpan ang unom ka mga billiard sticks, sixteen (16) billiard balls, one (1) billiard “triangle” rack, upat ka (4) billiard stick bag, pito ka (7) billiard chalks ug patad nga ₱440.00.
Anaa sa kustodiya karon sa kapulisan ang mga nakumpiskang ebidensiya alang sa tukma nga disposisyon ug susama na sab nga gipangpaslak sa presohan ang mga dinakpan.
