DAVAO CITY – Adunay nakitang lig-on nga basehan ang City Prosecutor Office aron nga pasakahan ug kasong pagpangawat ang usa ka lalaki sa usa ka tindahan sa Panacan public market.
Girekomenda ni Prosecutor Erna Orhla-Donasco nga pasakahan si Mario S. Medina ug robbery human ang gidusong reklamo sa usa ka Sittie Aina Mansing Aber.
Sa affidavit ni Aber, samtang natulog siya sulod sa tindahan, nakamata kini human nga adunay nagtabon sa iyang nawong.
Iya sumala pa kining gituklod hinungdan nga nakita niya ang nawong suspek nga nagunit ug unlan.
Misinggit ang biktima hinungdan nga gitabonan sumala pa ang iyang baba ug gisumbag sumala pa siya sulod sa pipila ka higayon.
Gikuha ni Medina ang salapi nga kantidad sa P650 ug paspas nga misibat.
Apan nababagan kini sa market guards nga sila si Antonio Terreon ug Gregorio Cabuga ug misulay pa pagsukol si Medina apan napugngan pa gihapon kini sa security guard.
Narekober sa posisyon sa dinakpan ang atsa dayon gi-endorso kini sa Sasa Police Precinct.
