Igo na lamang sa pagbangutan ang ginikanan sa usa ka dalagita nga una ng na-missing niadtong Abril human nga nakaplagan kini nga kalabira na sulod sa usa ka balay nga gi-abandona sa Brgy. Poblacion, Laak, Davao de Oro.
Gikakurat sa mga residente sa dihang nakaplagan ang biktima nga nag-edad og 14-anyos nga si Trudes Engada, nga residente sa Purok 11, Poblacion, sa nasampit nga munisipalidad.
Nasayran nga gipa-blotter pa sa pamilya ang biktima atol sa iyahang pagkahanaw nga nananghid lamang niadtong tungura nga molakaw.
Nakit-an ang biktima niadtong Lunes sa mga bata nga manguha lamang unta og marang nga prutas sanglit adunay mga punuan ang palibot sa maong balay nga layo sa mga silingan.
Samtang gikumpirma usab sa ginikanan sa biktima ang maong mga bukog subay na usab sa mga narekober nga personal nga butang nga gipanagiyahan sa dalagita .
Sumala pa sa mga residente nga sa nakalabay nga mga bulan nakapanimaho sila sa maong dapit apan wala lamang nila kini gipanumbaling tungod sa pagtuo nga usa lamang ka hayop ang baho nga ilahang nasimhotan.
Sumala pa nga bisan og kalabira na kining nakit-an, apan dako ang pagtuo sa kapulisan nga gihilabtan ang biktima tungod sa porma sa mga bukog sa mga paa nga nakabilangkad nga karon ginaimbistigahan na usab sa mga otoridad.
Ginasubay na usab sa mga kapulisan ang usa ka tawo nga katapusang nakauban sa biktima.
Sa pagkakaron, gihaya na lamang sa ginikanan ang mga bukog sa biktima nga narekober sa nasampit nga abandonadong balay.
