DAVaO CITY – Mismong si Davao City Mayor Inday Sara Duterte-Carpio ang nagbutyag nga ang municipal councilor nga nasikop nga nag-“pot session” sulod sa market stall sa Bankerohan Public Market sa milabay nga adlaw ang miyembro sa Hugpong ng Pagbabago (HNP).
Sumala sa Mayor nga gipapahawa na karon sa partido si Cipriano Ponce Sarona, 53 anyos, municipal councilor sa Kiblawan, Davao Del Sur.
Subay sumala pa sa nadawat nga report ni Mayor Inday gikan kang Kiblawan Mayor Carl Jason gitantang na nila sa listahan si Sarona.
Una ng gibutyag ni Davao City Police Office (DCPO) Director Police Colonel Kirby John Kraft, nga ang nahisgutan nga konsehal gikonsidera nga high-value target (HVT) sa otoridad human nga nadakpan kini kauban ang laing duruha ka pa ka mga suspek.
Kahinumduman nga negosyante ang nadakpan nga opisyal dinhi sa dakbayan nagabaligya kini ug mangga sa iyang stall sa Bankerohan market.
Nagbahad si Mayor Inday nga ang pagkasikop sa konsehal magsilbi nga pahimangno dili lamang sa mga ordinary nga tawo kung dili lakip na sa mga government officials nga nalambigit sa illegal drug trading ug uban pang dili maayo nga aktibidad.
Gikanayong si Sarona ang pinakabag-ong government official nga nasikop dinhi sa dakbayan.
