Gibutyag sa City Disaster Risk Reduction Management Office (CDRRMO) nga ang Multipurpose Evacuation Centers sa Mandug ug Catigan mahuman na sa katapusan sa Marso.
Sumala pa ni CDRRMO chief Retired PCol. Alfred Baloran nga hapit na mahuman ang mga evacuation centers, ug ang kulang na lamang mao ang mga koneksyon sa kuryente ug tubig.
Gipahibalo usab ni Baloran nga ang CDRRMO, kauban ang Department of Public Works and Highways (DPWH), Office of Civil Defense (OCD XI), ug City Social Welfare and Development Office (CSWDO), ang mao’y nanguna sa pagsusi sa maong evacuation centers.
Gipasiugda usab niini ang kahinungdanon sa proyekto, nga ang mga evacuation centers gidisenyo isip multipurpose evacuation areas, diin dili lamang kini magamit alang sa panahon sa kalamidad, apan, mamahimo usab kini gamiton alang sa uban pang mga kalihokan, susama sa mga training.
Ang mga evacuation centers, adunay prayer ug comfort room ug makahupot og 500 ka tawo nga nanginahanglan og temporaryo nga panimuyo gumikan sa mga kalamidad.
