Misanglit ang tingog sa kabataan, mga sektor, ug progresibong grupo sa Colon Street atol sa Bonifacio Day, Nobyembre 30, aron ipadayag ang klaro nilang panawagan: mobiya na sa puwesto si Pangulong Ferdinand Marcos Jr. ug Bise Presidente Sara Duterte.
Giingong nagdilaab ang ilang sentimyento batok sa padayon nga korapsyon, pagsaka sa krisis pang-ekonomiya, ug kakulang sa tinuod nga aksyon sa kasamtangang administrasyon. Sa tunga-tunga sa kadalanan, nagbutang ang mga raliyista og duha ka effigy, ang effigy ni Marcos Jr. gisul-oban og bandila sa Estados Unidos ug gipangalanan “Kadiliman,” samtang ang effigy ni VP Sara gisaputan og bandila sa China nga may markang “Kasamaan.” Allegory kini, matod sa grupo, sa ilang pagtuo nga ang duha ka lider nag-alagad dili lang sa sayop nga pamaagi, kondili sa dili sab klaro nga mga interes.
Sa pakighinabi sa Star FM Cebu kang Kei, chairperson sa Anakbayan–Cebu, iyang gipunting ang papel sa kabataan sa pag-atiman sa isyung panlipunan. Matod niya, ang rally dili lang batok sa liderato kondili usa ka pagsalid sa mas dagkong panawagan sama sa dugang-sweldo, tinuod nga repormang agraryo, ug lig-on nga kampanya kontra korapsyon.
Bisan og wala nila gilauman ang “overnight change,” masaligon ang grupo nga ang ilang lihok mahimong mitsa sa usa ka mas lawom ug mas lig-on nga kilusang bayan nga makapahigmata sa publiko.
Gilatid usab nila ang panawagan sa paghimog people’s coalition government — usa ka porma nga gobyerno nga dili kontrolado sa political dynasties o tradisyunal nga lider kundi girepresentahan sa mga sektor nga dugay nang nabyaan: mga mag-uuma, mamumuo, kabataan, ug lain pang marginalized communities.
