DAVAO CITY – Gaandam karon ang lokal nga kagamhanan sa Davao city og usa ka “Multi-layered security plan” alang sa ipahigayon nga oath-taking kang presumptive Vice President Sara Duterte, atubangan sa City Hall sa San Pedro Street, diin gikonsidera nga usa ka makasaysayong panghitabo nga gilauman usab nga modani dul-an 20,000 ang mutambong gikan sa nagkalahing dapit sa nasud.
Sumala sa tigpamaba sa Davao City Police Office (DCPO), Maj. Ma. Teresita P. Gaspan, hugot nga security measures ang ipatuman sa security sector aron masiguro ang kaluwas sa katawhan tungod ilang gilauman nga mudagsa ang mga tao nga mutambong sa maong aktibidad.
Dili usab mubutang og perimeter fence, apan aduna kini pavillion aron mas sayon alang sa publiko nga masaksihan ang oath-taking ni Sara Duterte. Bisan pa, ang mga kahikayan mahimong labi ka lisud alang sa mga awtoridad nga kontrolon ang katawhan.
Apan, gipasalig ni Gaspan nga andam ang security forces alang sa pagsiguro sa maong lugar, diin ang DCPO nakadawat og augmentation gikan sa Police Regional Office (PRO)-Davao aron ma-mintinar ang kahapsay atol sa inagurasyon.
Sumala pa kang Gaspan, ang lokal nga awtoridad, wala pa magkita aron mumugna og usa ka multi-layered nga plano sa seguridad, sa pagsiguro sa “inner, middle, and outer layers” sa lugar.
Diin, pangulohan kini sa city’s Public Safety Security Command Center sa pag-draft sa security plan, kauban ang uban pang sakop sa security sectors atol sa coordinating conference. Hingpit nga gibawal sab ang pagdala ug backpacks, jackets , ug hait nga mga hinagiban atol sa aktibidad.
